Jabuuti oo Gaashaanka ku Dhufatay Aqoonsi ay Israa’iil siiso Somaliland
Dowladda Jamhuuriyadda Jabuuti ayaa soo saartay bayaan xasaasi ah oo ay kaga jawaabayso wararka soo baxaya ee ku saabsan suurtagalnimada in dowladda Israa’iil ay aqoonsi u fidiyeen maamulka Somaliland. Jabuuti ayaa tallaabadaas ku tilmaamtay mid “guran” oo aan marnaba la aqbali karin.
Taageerada Midnimada Soomaaliya
War-saxaafadeedka ka soo baxay Jabuuti ayaa lagu sheegay in mowqifka dalkaas uu yahay mid cad, kaas oo salka ku haya ilaalinta madax-bannaanida Jamhuuriyadda Federaalka Soomaaliya.
“Marnaba lama aqbali karo aqoonsiga gumeystaha Israa’iil ee Somaliland. Waxaan taageero aan kala go’ lahayn u haynaa midnimada iyo wadajirka Jamhuuriyadda Federaalka Soomaaliyeed,” ayaa lagu yiri bayaanka dowladda Jabuuti.
Baaq ku socoda Caalamka
Jabuuti ma aysan ku ekaan oo kaliya diidmada, balse waxay farriin adag u dirtay beesha caalamka, iyadoo ka digtay in la sharciyeeyo ficillada ay ugu yeertay “kuwa gurran” ee ka hor imanaya shuruucda caalamiga ah iyo midnimada umadda Soomaaliyeed.
Saameynta Diblomaasiyadeed
Hadalkan ka soo yeeray Jabuuti wuxuu xoojinayaa isbahaysiga gobolka ee looga soo horjeedo faragelinta shisheeye iyo isku dayada lagu kala qeybinayo dhulka Soomaaliya. Waxay sidoo kale dhabar-jab ku tahay dadaallada diblomaasiyadeed ee ay Israa’iil doonaysay inay saameyn ku yeelato Geeska Afrika.
Leave a comment