DEG DEG: Dawladda Israa’iil oo Aqoonsatay Madax-bannaanida Jamhuuriyadda Somaliland

Israa’iil oo Aqoonsatay Madax-bannaanida Jamhuuriyadda Somaliland

JERUSALEM – Ra’iisul Wasaaraha Israa’iil, Benjamin Netanyahu, ayaa maanta si rasmi ah ugu dhawaaqay in dawladda Israa’iil ay aqoonsatay Jamhuuriyadda Somaliland inay tahay dawlad madax-bannaan oo leh gobanimo dhammaystiran.

Israa’iil oo Aqoonsatay Madax-bannaanida Jamhuuriyadda Somaliland

Talaabadan taariikhiga ah ayaa timid ka dib markii heshiis wadajir ah ay magaalada Jerusalem ku kala saxeexdeen Ra’iisul Wasaare Netanyahu, Wasiirka Arrimaha Dibadda Israa’iil Gideon Sa’ar, iyo Madaxweynaha Jamhuuriyadda Somaliland, Dr. Cabdiraxmaan Maxamed Cabdillaahi.

Qodobbada Muhiimka ah ee Heshiiska:

• Ruuxda Heshiisyada Ibraahim: Baaqan wadajirka ah ayaa lagu saleeyay ruuxda heshiisyadii nabadeed ee Abraham Accords, kuwaas oo lagu bilaabay hindisaha Madaxweyne Donald Trump.
• Hambalyo iyo Casuumaad: Ra’iisul Wasaare Netanyahu ayaa hambalyo u diray Madaxweyne Cabdiraxmaan Maxamed Cabdillaahi, isagoo ku bogaadiyay hoggaamintiisa iyo sida uu uga go’an yahay horumarinta xasiloonida iyo nabadda gobolka. Sidoo kale, wuxuu ku martiqaaday Madaxweynaha inuu booqasho rasmi ah ku yimaaddo dalka Israa’iil.

• Iskaashiga Mustaqbalka: Labada dhinac ayaa ku heshiiyay inay si degdeg ah u ballaadhiyaan xidhiidhkooda, iyadoo xoogga lagu saari doono iskaashiga dhinacyada Beeraha, Caafimaadka, Tiknoolajiyadda, iyo Dhaqaalaha.

Mahadnaq iyo Garowshiyo

Madaxweynaha Somaliland ayaa uga mahadceliyay Ra’iisul Wasaare Netanyahu go’aanka taariikhiga ah ee uu qaatay, wuxuuna ammaanay guulaha Ra’iisul Wasaaruhu ka gaadhay la-dagaallanka argagixisada iyo horumarinta nabadda gobolka.

Dhinaca kale, Ra’iisul Wasaare Netanyahu ayaa u mahadceliyay Wasiirka Arrimaha Dibadda Sa’ar iyo Madaxa Sirdoonka Mossad, David Barnea, doorkii ay ka qaateen dhalashada guushan diblomaasiyadeed. Wuxuu sidoo kale shacabka Somaliland u rajeyneeyay guul, barwaaqo, iyo xorriyad.