MUQDISHO – Khatarta Imaaraadka Carabta : Waxaa isa soo taraya baaqyada ku aadan in Dawladda Federaalka Soomaaliya ay dib u eegis xagjir ah ku sameyso xiriirka ay la leedahay Isutagga Imaaraadka Carabta (UAE). Abu Dhabi ayaa lagu eedeynayaa inay hoggaaminayso qorshe ballaaran oo lagu kala qeybinayo dalalka muhiimka ah ee ku yaalla badda cas iyo marinka Bab al-Mandab.
Xeeladda “Kala Qeybi oo Xukun”
Imaaraadka Carabta ayaa la rumeysan yahay inay dhistay shabakado “u-adeegayaal” (proxies) ah oo ka shaqeeya duminta qarannimada dalalka Soomaaliya, Yemen, iyo Suudaan. Iyadoo adeegsanaysa ururada sida STC (Yemen), RSF (Suudaan), iyo maamulada Somaliland iyo Puntland, Abu Dhabi waxay doonaysaa inay gacanta ku dhigto marinnada istiraatiijiga ah ee badda iyadoo ka dhuumanaysa mas’uuliyadda caalamiga ah.
Isbahaysiga Cusub: UAE, Itoobiya, iyo Israa’iil
Waxa ugu khatarta badan ee hadda soo baxaya waa sida Imaaraadku ugu gogol-xaaray in saameynta Itoobiya iyo Israa’iil ay ku fido gudaha Soomaaliya. Xiriirka dhow ee dhowaan dhex maray Israa’iil iyo gooni-u-goosadka waqooyiga ma ahan mid iska yimid; waa natiijada faragelinta aan loo meel deyin ee Imaaraadka oo sanado badan soo socotay.
Qorshahan ayaa u muuqda mid lagu dhisayo “Emiiraadyo yaryar” oo ku dhex yaalla Soomaaliya, kuwaas oo u adeegaya danta Abu Dhabi halkii ay u adeegi lahaayeen qarannimada Soomaaliyeed.
Fashilka Hoggaanka Villa Somalia
Waxaa walaac weyn laga muujinayaa aamusnaanta madaxda ugu sarreysa dalka sida Madaxweyne Xasan Sheekh Maxamuud iyo Ra’iisul Wasaaraha. Haddii aan tallaabo geesinnimo leh la qaadin—oo ay ku jirto in dalka laga saaro Imaaraadka sidii ay Yemen sameysay—waxaa xigta in la waayo gacan ku haynta Puntland iyo Jubbaland.
Soomaaliya waxay u baahan tahay inay hurdada ka kacdo ka hor intaanan la dhammaystirin kala dhurista madax-bannaanida dalka. Haddii maanta laga aamuso faragelinta UAE, berrito waxay noqon doontaa mid aan laga soo kaban karin.
Leave a comment